കോവിഡ് 19 ബാധയുടെ പശ്ചാത്തലത്തില്‍ ലോക്ക് ഡൗണ്‍ പ്രഖ്യാപിച്ചിരിക്കുമ്പോള്‍ താന്‍ എങ്ങനെ പ്രവര്‍ത്തിക്കുന്നുവെന്ന ചോദ്യത്തിന് മറുപടിയുമായി പ്രധാനമന്ത്രി നരേന്ദ്ര മോദി.
മന്‍ കി ബാത്തിലെ ഈ ചോദ്യത്തിന് ആനിമേറ്റഡ് യോഗ വീഡിയോകള്‍ പോസ്റ്റ് ചെയ്തായിരുന്നു മോദിയുടെ മറുപടി. ഇത് തനിക്ക് വളരെയധികം ഗുണം ചെയ്യുന്നുവെന്നും മോദി പറയുന്നു.
”ഇന്നലത്തെ മന്‍ കി ബാത്തില്‍, ഈ സമയത്ത് എന്റെ ഫിറ്റ്‌നസ് ദിനചര്യയെക്കുറിച്ച് ആരോ എന്നോട് ചോദിച്ചു. അതിനാല്‍, ഈ യോഗ വീഡിയോകള്‍ ഞാനിവിടെ പങ്കിടുന്നു.
നിങ്ങളും പതിവായി യോഗ പരിശീലനം ആരംഭിക്കുമെന്ന് ഞാന്‍ പ്രതീക്ഷിക്കുന്നു,” പ്രധാനമന്ത്രി ട്വീറ്റ് ചെയ്തു.
”ഞാന്‍ ചെയ്യുന്ന കാര്യങ്ങളെക്കുറിച്ച് വീഡിയോകള്‍ സോഷ്യല്‍ മീഡിയയില്‍ പോസ്റ്റു ചെയ്യും. ഒരുപക്ഷേ നിങ്ങള്‍ക്ക് വീഡിയോകള്‍ ഉപയോഗിക്കാം.
ഞാന്‍ ഒരു ഫിറ്റ്‌നസ് വിദഗ്ധനോ മെഡിക്കല്‍ വിദഗ്ധനോ അല്ല. ഞാന്‍ ഒരു യോഗ പരിശീലകന്‍ മാത്രമാണ്. കൊറോണ ലോക്ക്ഡൗണ്‍ സമയത്ത് ഇവ നിങ്ങളെ സഹായിക്കും.
യോഗ പരിശീലിക്കുന്നത് വര്‍ഷങ്ങളായി എന്റെ ജീവിതത്തിന്റെ ഒരു അവിഭാജ്യ ഘടകമാണ്, അത് പ്രയോജനകരമാണെന്ന് ഞാന്‍ കണ്ടെത്തി.
നിങ്ങളില്‍ പലര്‍ക്കും ഫിറ്റ്‌നസ് തുടരാന്‍ മറ്റ് വഴികളുണ്ടെന്ന് എനിക്ക് ഉറപ്പുണ്ട്. മറ്റുള്ളവരുമായി പങ്കിടുക … യോഗ വീഡിയോകള്‍ വിവിധ ഭാഷകളില്‍ ലഭ്യമാണ്,” മോദി പറഞ്ഞു.
കുടുംബവുമായുള്ള ബന്ധം, ബോര്‍ഡ് ഗെയിമുകള്‍, ക്രിക്കറ്റ് കളിക്കുക, പാചകം ചെയ്യാന്‍ ശ്രമിക്കുക, പൂന്തോട്ടപരിപാലനം, വായന എന്നിവയ്ക്കായി ലോക്ക് ഡൗണ്‍ സമയം വിനിയോഗിക്കുന്നുവെന്ന് പലരും പറഞ്ഞതായി മോദി പറയുന്നു.
”സോഷ്യല്‍ മീഡിയയില്‍ ആളുകള്‍ അവരുടെ തബലകളും വീണകളും പൊടിതട്ടിയെടുത്ത് പരിശീലിക്കുന്നത് ഞാന്‍ കണ്ടു. നിങ്ങളും അത് ചെയ്യണം,” പ്രധാനമന്ത്രി പറഞ്ഞു. എന്തായാലും യോഗയുടെ അനിമേറ്റഡ് വീഡിയോകള്‍ ഇതിനോടകം ഹിറ്റായിക്കഴിഞ്ഞു.
